اضحك على هم الليالى .. الجديد

[حرف وشعر]

ارحل وغيّر جو واشبع وناسه=وارمى احزان القلب فى جارف السيل
ترى الحزن ماجاب غير التعاسه= وعين(ن) تهل الدمع فى تالى الليل
أضحك على هم الليالى وباسه= واشعل لذاك الهم ياصاح قنديل
واصحب رفيق(ن) طاب راسه وساسه=ولاتصحب اللى مايصون المعاميل
لمة صفا مابين ناسك وناسه=فى منزل (ن) ماشابه القال والقيل
شربة صفا مابين كاسك وكاسه=وبن(ن) عليه اقناد بالوزن والكيل
وهرجة خلا مابين مزح وكياسه=واعلوم سنعه من اعلوم الرجاجيل
تسوى مع اللى للخلا طاب راسه=ماحاز كسرى عندما جرت الخيل
مرباع جو(ن) جاك عند التماسه=فى موسمه يوم(ن) بدت نجمة اسهيل
والعمر ساعه تنقضى بالوناسه=ولاّ انقضت بالهم والغم والويل
ومادام سنع الود مابه سياسه= ابا اعتزلهن امهات الخلاخيل
ترى الهوى لا لاعب القلب حاسه= حيس الحبل لاشد الكف بالحيل
واللى بنى بيت(ن) على غير ساسه=لابد تذريه الذوارى على الليل