ثلاث الليالي في غيابك.. ثلاث سنين = أجل كيف لو غبتي شهر.. وش يجي فيني ؟؟
أحس الدقيقه رمح.. والثانيه سكين = الى حلت الذكرى.. تقــطـّع شراييني
اذا جيت باب البيت.. حارت بي الرجلين = تقول الزلازل.. تنتفض تحت رجليني
واشوف الشوارع في غيابك.. لها وجهين = عمود الإناره في طريقي.. يعزيني
وأشوف الحديقه.. كنها المقبره بالعين = بها الورد والريحان.. ماعاد يغريني
ألف المدينه.. بس أدور طريقك وين = على دربك المشؤووووم.. ضاعت عناويني
سألت القمر.. عن حالة العاشق المسكين =لقيت القمر يبكي ..بدل مايسليني
غيابك غياب النور.. بعيوني الثنتين = علــــي الطـّـلاق.. إنك تساوي نظر عيني
أبي تاخذ الموضوع ..جد وتجي هالحين = ذبحني( منام الثلج )..شوفك يدفيني
تهاوت علوم الصبر.. والمرجله والدين =خلاص أعترف لك.. ماجرى لي يكفيني
ترى القلب من شوفة ثيابك.. غدا قسمين = الى شفت دولاب الملابس يبكيني