مثل ماوعدتكم امس اسولف عليكم سالفتي ابوفي بوعدي الشي ذمه بعد وماعندي استعداد احط في ذمتي شيء .. المهم ..
في سنة من الايام كنت مسافر على طائره بوينج 737 متوجه الى امريكا وفيما حنا بالطريق قال الكابتن وش رايكم ناخذ جوله على جزيرة ايسلاند يقولون انها زينه ولو انها بارده شوي قلنا ما يمنع ناخذ جوله ناخذ جوله وش ورانا المهم مالكم بطول الهرج وحنا طايرين في الطريق الا وتبنشر طيارتنا الظاهر المسامير عندهم واجد تعرفون حركة العمار كثيره وهابين في العمار الظاهر الصندوق العقاري عندهم نشيط , المهم لما حصل البنشر وقامت طيارتنا تعرج اشرنا على الكابتن يوقف على اقرب غيمه على شان نركب الاستبنه لين ناصل لاقرب بنشر المهم وقفنا على هاكالغيمه اللي وش زينها متساويه بس مشكلتها ثلج وحنا اللي نحاول نرفع الطياره بالعفريته بس ماقدرنا قامت العفريته تخفس في ثلج الغيمه والمشكله ان البرد ذبحنا وبعد مارفعنا العفريته بعد جهد جهيد وبغينا نفك الكفر مالقينا مفتاح العجل صار الكابتن ماخذ مفتاح العجل حق الترايستار ماهو لطيارتنا واحترنا وش نسوي وش نسوي .. قالو بعض الركاب حنا معنا اطفال وكبار بالسن مايتحملون يجلسون بلا اكل ذبحهم الجوع ولازم ياكلون والاكل معنا خلص حتى طواقينا اكلناهم وما عاد معنا شي ناكله قلت انا لازم نلقا لنا حل وقلت لواحد من حقين امن الطائره لازم تعطيني المسدس حقك قال وش تبي به قلت ابصيد طيور على شان نشويها للركاب قبل مايموتون من الجوع ومالنا حل غيره قال مايخالف واعطاني مسدسه وقمت اتصيد من هالطيور المهاجره لين اني هقيت اني صدت اللي يكفيهم لليوم ويوم جيت خوياي قلت لهم ابشرو جاكم الفرج وانا اللي امسط بالطيور وسطهم قال واحد وش نسوي بها قلت نشويها قال وشلون قلت اي واحد معه صندوق خشب يعطينا اياه على شان نكسره ونشب فيه ونشوي طيورنا وفعلا كل واحد جاب صندوقه وكسرنا هم وخليناهم حطب وشبينا فيهم بعد ما ابعدنا اكثر من مية متر عن الطياره خفنا لاتحترق ونبلش بعد , المهم يوم قرب الشوي يخلص بدت الغيمه اللي حنا جالسين عليها تذوب شوي شوي من حرارة الجمر ويالله تلاحقنا ناكل شوينا وتنقسم الغيمه قسمين قسم فيه الجماعه اللي كانو ياكلون وقسم فيه الطياره وبعض الركاب اللي كانو يحاولون يفكون الكقر بسنونهم بعد ماصار المفتاح مايركب عليها وسبحان الله صار من حظ اللي كانو عند الشوي امطرتهم الغيمه في امريكا ووصلو على خير وسلامه وتجمعو في مكان حول منصات اطلاق الصواريخ التابع لشركة ناسا وحنا بعد ماصلحنا الكفر اقلعنا ولحقناهم وتقابلنا حنا ويهاهم وسلمنا على بعض ودموع الفرح قامت تصب من عيوننا وشوي وتسيل هالكالشعبان في امريكا من دموعنا بس كانت رحله لاتنسى خصوصا لما كنا على الغيمه وقبل مانقلع بشوي كانت النيازك من يميننا ويسارنا نازله باتجاه الارض شي رهيب حسينا اننا في كرنفال وألعاب ناريه ..
يمكن اكمل السالفه بعدين بس بشرط مايطلع لي واحد يقول اني كذوب والا يحسسني انه ماهو مصدق.