[فارس القوافي]

مشينا بالخطا لين ابتلينا = وطحنا بالندم والدمع سالي
غلطنا فيك ياشيخ ٍ علينا = وصار العذر ما يسوى ريالي
ألا ياليت مافيــكم خطينا = ولا ســــرنا بدرب ٍ له توالي
توالـــي دربنا دمع ٍ بكينا = وضيق ٍ بالصدر يبري بحالي
جرحنا باليسار وباليمينا = وقدّينا اللـــحم من كلّ جالي
سرحنا بالسواليف وسهينا = وقلنا شيّ ماهو بالفعالي
عليكم بالروايات افترينا = نسينا فضلكم يوم الفدا لي
خذينا منك لكن ما عطينا = دُمرنا صورة الوجه الخيالي
وكسّرنا المرايه باليدينا = وطاحت اقنعه ماهي عدالي
ألا يادمع جاوب للحزينا = وكفّر عن خطا في شخص غالي
تشرّبت الحزن من مصرعينا = وناح القلب من سود الليالي
طلبنا العفو لكن ما يبينا = خسرنا شيخنا سيْد الرجالي
خسارة واحد ٍ شهم ٍ ثمينا = تساوي ألف رجّال ٍ قبالي
وانا ياناس ياللي سامعينا = طلبت العفو كان انه بدالي
دخيله كان بيدينه يجينا = وبرمي له شماغي والعقالي
طويل العمر يصفح ما يهينا = واعرْفه طيّب ٍ صدره شمالي
سويد الوجه انا والمقلتينا = عُقُب ما كان لي وجه ٍ مثالي