[سمّار]

بالحرام انك وَهَج هالديره=وإن تغيّبت انعمَت وانصمّت
ما بو علومٌ ولا بو سيره= غير لاحضرتك فيها اتْسمّت
ان لمع سيفك وشعّ شطيره=رَجْفَت قلوب الردا وانغمّت
والجيوش اللي تجيك مغيره=من مقاطيع الطرق والتمّت
كل واحد قام باع خشيره=والبيوع على النجش ما تمّت
ياسوالف ورد فاح عبيره =ياربيع الروضه اللي جمّت
صُب فنجال الغلا ونديره=لين تروى روح فيك انحمّت
همّت على شئ يالله الخيره= ياعسى همّت بمن هي همّت
مرحبا ربّع بقلب الحيره=لو تكن جولتك قبله عمّت
الشغاف مبَسِّطين حريره=والعلايق لك رخت وانزمّت
انّ مهما كان من هو طيره=كفخة جناحه لقلبي ظمّت
والله ان القصه عاد مثيره=ما وعتها الا نفوس اهتمّت
عيد مرسالك وعِد تحريره=عطّر انفاسٌ لعطرك شمّت
دامني آشوفك وهج هالديره=فان تغيّبت انعمت وانصمّت