[ناصر السهلي]

السلام عليكم ورحمة الله وبركاته

مبطي مانزلت شي في قسم الشعر

وهذي أبيات للتواصل



لي صاحب ٍ ميّت ضميره وهو حي
ولايميّز من عدوّه صحيبه

دراهمه واجد ومرجلته شوي
ينفع معادينه ويبلش قريبه

ويعد نفسه شي من غير لاشي
والعيب عنده حاجةٍ ماتعيبه

الله يلومه طافي الضو والضي
ماهوب يثبت فالأمور الصعيبه

للمصلحه ينسف كرم حاتم الطي
وعنده مواجيب النشامى تعيبه

مايدري ان المصلحه مالها في
عنّي تقفّي به ويمّي تجيبه

ليت الردى له طب لو كان بالكي
أهم شي إنّا نحصّل طبيبه

لكن بعض الناس عيٍ ولد عي
ولايفتهم فالمخطيه والمصيبه