مع عبدالله بن علي الزامل
احذر يغرّك بعض الأزوال بالسوق=يلبس عباة ويخفي الوجه بحجـاب
يغريك لا هارجك في حسن منطوق=وكفوف تلمع كلها نقش وخضـاب
والبودرة منهاوضع نصف طابـوق=وكْريم مع حمرة على زين الأطياب
يمشي يهز الردف والراس مفهوق=مثل الحمامة والحقيقة هو غـراب
صحيح ما قالوا هل العرف والذوق=بعض البشر يلمع وهو نور كـذاب
مع
نمر بن صنت الحافي
خطو الولد سود ثيابه من العيب=مافيه من درب الرجاجيل خصله
مشتاله المدحور بالكبر والريب=قام يتزين له بليس ورقصــــــله
ترى كثير النبح مايحرم الذيب=يملا بطانه والكلاب تحرصــــله
وظل العدو لو تضربه بالمشاعيب=يضحك ومشعابك ثلاثين وصله
لي صار ضدك يحتمل للمواجيب=عطه الوقار ولاتنشد عن أصله
لاتستمع للي علومه رباريب=ليا جا لزومه كنه الفاس نصله
مع
عبدالله السلوم
كم واحد نفسه دنيه ومسكين=وهو يغرك باحسن اللبس والزي
يحسب سواليف الرجال سباحين=يرجي ثمر زرع قطع دونه الري
اوصيك ياسامع كلام الموصين=لا استعصت العله ترى طبها الكي
وان صادفك في وقتك الموقف الشين=فاصبر ترى درب الصبر يورد المي
والحق مايفرض بوضع القوانين=الا بدين يفرق الحسن والسي
ولايروي الضامي كلام متمنين=ولاصار ماشرع بكفه على الطي
وان بار بك صاحب وهو يقدر الزين=فاطو الرجا واختر لشمسه على الفي
تبقى عزيز النفس لو عشت بالطين=ولامنةٍ توصل قراره جبل طي
اذكر من الماضي نوادر علومه = واشوف بالحاضر تغير سجاياه
الوقت نفس الوقت ليله ويومه = هو ماتغير في صروفه ومسعاه
اللي تغير فيه واخلف سلومه = ناس تعايش فيه حلوه وبلواه
واكثرهم اللي مايميز يمومه = تاه الدليل وضاع مع ضيعة ارياه
والناس تسعى والنفوس محكومه = وللعقل سلطان على الشخص يقداه
يامن نشدني عن جواب يرومه = خفف على قلبك هموم تحداه
ساير زمانك لاتساير خصومه = ماحيلة العاجر سوى لوم دنياه
مع
متعب التركي
الموت هين البلا وش ورا الموت=عند الحساب يهون سهم المنايا
باكر نموت وتصبح قبورنا بيوت=وعقب القصور بضيقات الزوايا
في جوف الارض وكل من حولك سكوت=وتعاقبن بالقبر عوج الحنايا