الا يا طير يمهاجر رفض ذل الزمان وطار = الا بالله تاخذني حياة الذل ما آبيها
تعبت وتاهت افكاري بوقتٍ يقهر الأحرار= مدام البوم والحصني تلاعب في مفاليها
ابي حريتي مثلك أطير ولا خشيت أخطار= وامتع ناظري بالأرض واللي عايشٍ فيها
اخذت من الزمن حلوه وسقاني المر والأكدار= وعلمني اكون إنسان افكر في تواليها
عرفت ان الجهل نعمه بوقت يعمي الانظار= ولا يبغى سوى ظلٍ تخلى عن مباديها
ونا مقدر اساير لو اعيش العمر في امرار= مبادي الجدّ في دمّي بنبضاتي اغذيها
رفيع الراس ما يخضع لغير الواحد القهار= اعيش بعزتي مهما الزمن حاول يوطيها
فلا يمكن يحقق مايبي عن طيب وإلاّ اجبار = غسلت ايدي ولا ابي منه في يوم يحيّيها
تركته دونما آسف ولا فكرت باللي صار= حياة الحر ما تسوى اذا نفسه يدنيها
كثير من الملا يفخر بأنه حر كالأطيار = وهو مسجون سجن الذات داله في غناويها
يذل النفس لاجل الجاه فكره دوم في الدولار= يبي ياصل مثل غيره ولو بالذل يشريها
وينسى انه غدا خادم وصار العبد عن اصرار= يعيش ابلا كرامه لو وصل لأعلا معاليها
ونا اقسمت ما غيّر مبادي ترثة الأخيار= لأني عارف الدنيا ابرحل يوم واخليها