[الطائر المهاجر]

عهدٍ على قلبي ولو باح سدّه = يخفيك في نبضه بعيـدٍ عن الناس
حتى ولو جازيت حبّي بضدّه = أرجي من الله رجعتك عذب الانفاس
في منهج الاسلام ما فيه ردّه = وحبي على الإسلام منهج ومقياس
درب الردى ماجيت في يوم حدّه = وضح النقا دربي ولادست الادناس
والحب للانسان ما هـو بيـدّه = يا ما يذل رجال مرفوعي الراس
ومن لا عرف طعمه ولا حس فقده= لو كان جسمه حي معدوم الاحساس
واللي يحب اثنين خاين لعهده = يخدع لنفسه للكذب دوم لبّاس
ومن لا تنقّى مهرته ضاع جهده = ما ينفعه يا ليت فالعرق دسّاس
وأنا بكل العمر حبيت وحده = ظبيٍّ اصيلٍ من عروقٍ لها ساس
لا بان نور الشمس يعكس بخدّه = بدرٍ تجلّى واشرق الكون بالماس
عمّ الخليج وما توقف بجدّه = غطّى على بيروت وانحى على فاس
توّه صغير السن ياغضّ نهده = تفّاح لبناني على غصن ميّاس
سحر العيون الناعسه من يصدّه = صوّب فؤادي واشعل الفكر هوجاس
القلب له وحده الى يوم لحده = ويمكن بعد بعثه مع الحور يحتاس
ولو ما لقاه وجنة الخلد قصده= يرجي من الله ما يعود بالافلاس
ما يحتمل هجره ويتركه وحده = يقضي بقايا العمر بالحزن والياس
قلبٍ شرى قربك علامك تردّه = يكفيك بعدك ما اهتنى الليل بنعاس
لاصار حبك كالعسل لاتضدّه = خذ ما تيسر كل شئ له قياس
وان كان باقي له بقلبك مودّه = ارجع لقلبي بالمعزه على الراس