صوت وصدى بينه وبين عبدالله بن عون
يقول ابن عون :
هات القلم يامال زينات الأوفاق=ياصاح ونسني ترى خاطري ضيق
خل القلم من بين اصابعك دفاق=يرعف على صفحات بيض لواهيق
يرسم عليهن ماتحلا للأذواق=طرائف تشرح صدور مغاليق
تصرف هجس ماتسلف ولا باق=لو القواف قد رموها التفافيق
حطوا لهم قبلي على الطرق طوراق=والسبك غير السبك صوره وتطبيق
لا سالب معنى ولاني بسراق=لاخير في قول يجي فيه تبريق
اقبل طلوع الفجر وانباج الأشراق=وانا اتقلب ماتريح ولا ليق
بلشان مع قلب مغربل ومشتاق=ادخل على الله من ترد التوافيق
قلب هواجيسه وهمه له ارفاق=لحقا عليه مغربلات العشاشيق
مالي علي الفايت اليا فات ملحاق=فات الفوات وقربت يبست الريق
عليك ياللي حط بالقلب دقاق=اونس رجيفه مرقل بالمعاليق
سمح المحيا شيخ زينات الاخلاق=اللي عليه اعلام قلبي مدانيق
مجمول اجمل ماتحمل ومالاق=ورد تغريف ماعبث به ولاذيق
لليض من دونه فلاني بعشاق=من غير ذم في رقاب الغرانيق
خلا غلاه بداخل الجوف لصاق=امخرق رمانة القلب تخريق
ليا اعترض طاريه للذهن مراق=تجاوباً جناح قلبي بتصفيق
خلاني اخلج مثل ماتخلج الناق=اللي ولدها ضيعوه الملاحيق
عليه اجاوب لايع الورق بلعاق=واهرف هريف الذيب نصبه وتطريق
اويق في متن الحجا ضيق وشياق=اخذ برأس الرجم غفله وترويق
رجم براسه لاشهب اللون مشراق=للريح في شامخ اركونه تصافيق
كنه يوسع خاطري عقب الاغلاق=يوم اعتلى في متن بعض الشواهيق
من عبرتن في داخل الحلق بخناق=ما غير اذودها على قدر ماطيق
اكتم اشهاق ويظهر الصوت بشهاق=مالي نديم الا زفير التشاهيق
زفير عبراتن مطرهن لياراق=غرق هميله مقدم الجيب تغريق
تاخذ من الضيقه على قدر الانفاق=من ماب صندوق النحر عقب مافيق
واصيح للبذال في متن شوهاق=حيثه من اشخاص الرجال الموافيق
كوده يشاكيني على ج ور الاضياق=اللي هجوسه في بحرها غواريق
يامرشد اشكي لك غرابيل الاشواق=اللي لحقني من وراها ملاحيق
مشرقني الهاجوس يامرشد اشراق=كني عليه موكلا بالتحاقيق
يابو سعد حيثك مجرب وفراق=وتحط بين الكذاب والصدق تفريق
انا نخيتك من عميقات الأعماق=ماهو مجرد مزح والا لماصيق
اشكي عليك من الهواء ولف وافراق=وهم وباس مطوق القلب تطويق
لحيتبك لحة طريح بمطراق=خلوه ربعه طايحاً عقب ماعيق
عقب الشجاعة والفخر طاح ونعاق=صارة حياته من عدوه تشافيق
يابو سعد من غير تلزيم ورهاق=انا شفاوي في نصيحتك ومشيق
ماشوف للشكوى نفوذاً وممراق=الا على عنوان شكوى المطاليق
ولاني بحط لمخرث العود معلاق=الا عموداً يحتمي للمعاليق
وجهت لك شكواي في بيض الأوراق=شكوا بعنوانك توجه بتشريق
اسوقها يمك جريه وتنساق=عليك يامدل جميل الطواريق
وسلم ودم مالاح في المزن براق=ما ناح ورق فوق لوح مواريق
تحيه فيها شذا المسك زعاق=وازكى سلام بين الأصحاب قد سيق
ورد عليه مرشد
يالله ياللي للمخاليق رزاق=يامنبت بالقاع خضر الزماليق
تعين من قلبه جزوع ومحراق=وجنه عظيمات الشكاوي تلاحيق
جاني علي زين التماثيل مدناق=من هاجس له بالضماير تخافيق
توارد قلبي هواجيس اضياق=وخلا غرامي له بالأفكار تحليق
خله يسير امداد في زين الارناق=مثايلاً ماحضروها المطافيق
عبدالله النايف لزمني بمسباق=لزمت اسبوقه اللي كفخ بالمسابيق
امبارك منه السلامه والاعتاق=كثر علي مع المسير الصواعيق
عرضني الشوحه وقال الضعن ساق=وخلا خفوفي من حفاهن مراهيق
وانا معه لو علي قطع الاشناق=قول صحيح ماجمعناه تلفيق
وانا مولع في طويلات الاعناق=اللي غلاهن شلق الجوف تشليق
اللي بهن طوق الذهب شبك بحلاق=ونظم القماش اللي جنوه الفواليق
يزمي على كبدي من المر شبراق=من واحد شوفك لزوله تراميق
شف لياذير وحقق تحقاق=عاف الشعيب اللي بقشعه مداريق
خلاك تمشي جسم من غير معلاق=شال الجهاز وهيكل الجسم تعويق
وحالتك منها بش جسمي بالاعراق=وقامت تصلفقني هموم تصافيق
وخليت قلبي بين الاضلاع خفاق=بين لي الموضوع من غير توهيق
وشف ماتبي مني وبعني بالأسواق=وامضي على بيعي وتاطق تناطيق
لو كان مالي في مساعد ملياق=بيني وبينك مثل ابنات وطويق
لاشك انا بنصحك مانيب دراق=نصيحة فيها عن الياس تعتيق
ان شفت في حبل الرجاء جل ودقاق=ترى المسك بالروث مافيه توفيق
بالك تخفي عن لزومك بالارواق=الفه مثل الماء ليا نثر ماحيق
شف لك رجال لك صحيحين واصداق=ربعن ليا من الضعن للضعن شيق
كل اردحن وان قام لجاه زهاق=حبورهم فك العقول المغاليق
واخذ الحبيب ولح اعاديك بطراق=وخله يدور في المراح الخماليق