حلم واللى علـم قبـل البارحـه حاكانـي = صوت ما أعرف كيف أوصّف نغمته وسلوبه
من بعيد هنـاااااك باسمـي ردد ونادانـي = ولتفـت ورادتـي مـن حيرتـي مسلوبـه
جاوبه قلبي قبـل يبـدأ الجـواب لسانـي = واتجهت بكامل احساسي لصـوب دروبـه
صوت فيه البحـه اللـي تنعـش الآذانـي = والسعيد اللـي تمنـى ويحصـل مطلوبـه
فيه سيمفونيـة العـزف الرقيـق الحانـي = لا نطق يا مصدق حروفـه ودوبـه دوبـه
وفيه من قطر الندى لا داعـب الأغصانـي = رقـه ودقـه وهمـس وكبريـا وعذوبـه
صوت يشرح خاطر المتضايـق الزعلانـي = ويشفي جروح المريض اللي أسير عطوبـه
أسمعه فـي كـل وقـت يخالـج الوجدانـي = وأمتلك فكري معـاه فكـل لحظـه يجوبـه
ذاب في وسط الخفوق وسار في شريانـي =ومن حلاته كنّـه السكـر حلـو مشروبـه
وانتشت معـه الحيـاة وزالـت الأحزانـي = والسعـادة فـي مقاطـع نبرتـه مكتوبـه
أدمنـه كلـي وهمسـه جرعـة الإدمانـي = وفي غيابه نار في وسط الحشـا مشبوبـه
لو بعـدد فـي محاسـن حسـه الفتانـي = ترجع أبيـات القصايـد مفحمـة مغلوبـه
إيييييه يا محلاك صدفـه جرسهـا ودانـي = لأبعد حدود الخيـال وصـارت المحبوبـه
أشهد إني مغـرم وعاشـق وبـه هيمانـي = وأشهد إنه حطّـم أسـوار العنـا بعجوبـه