[عادل العتيبي]

أسمعوا قول المكبّل بالسلاسل والحديد=كأنه أللي وسط حفرة مايقارن جمّها
راكب أللي لامشى بالليل والمسرا بعيد=قال من ينظر قدوّمة ويل أبوها وامّها
الهنوف الفارقه في جيدها عن كل جيد=كأنها طلة جبينه لا تنرفز دمّها
فوقه أللي مايبيله لا عوين ولاعضيد=كل مايثني يمينه قام يرفع كمّها
من طرف جدة توجه لاتميل ولاتحيد=لين ريضان القصيم تشوفها وتشمّها
ديرةٍ عندي غلاها كل ماينقص يزيد=ثابته في وسط قلبي والضلوع تضمّها
أسكنت في وسط قلبي مثل شريان الوريد=احبها حب الهنوف لخالها ولعمّها
والله أني ياجماعه من غلاها مستفيد=كل ماضاقت عليّه راح قلبي يمّها
ساكنك من يسكن العلّيا وله فيها رصيد=كلمته بين الرجال يقولها ويتمّها
فزعه أللي شاب راسه من عنا الوقت الشديد=وفزعه أللي حالته من كل شي يذمّها
يوم كلمته وانا من هذي الدنيا زهيد=والمدامع فوق خدي ماقدرت ألمّها
دق صدرة للزوم وقال عندي ماتريد=فزعةٍ من كف صاحب انت أبوها سمّها