خلي الهموم إذا بغى النوم طاح ونام=وأنا لا بغيت أرقد حصل ما يجزيني
تقارع هواجيس الضماير قريع حيام=على جال عدٍ صوعوه الوارعيني
وقلبي كما عسوٍ زوى جذعه الصرام =متغانمٍ ربعٍ على الهجن مقفيني
برا الحال من كثر التوجاد بري اثمام=محيلٍ ولاعته اللواهيب والشيني

ترى ادواي حـرف الجيم والعين حدره لام=قدر سـاعةٍ ليمن حصل داعج العيني
سمية سهيل وعنبر الهند يا علام=مع اللي مقره في غزير المياديني
وسمية تورده المراكب على الدمام=وتلقى سميه في كثير الدكاكيني
وترى الأسـم الآخر لاضحك زحزح الظلام=وغنت له الورقـا رقيق التلاحيني
ورابع سمي العذب من دور عام لعام=تشتت لأهـل المال عقب المقاطيني

البارحة جفني جزا النوم ما امرح=ولا كن في مقلة عيوني جواريح
ولا كن موقي بالقليمـي يجرح=ويذر فيـه مشـكلات الذواريح
سهرت لين الفجر بالنور وضح=تخالفوا بين الأسواق المواريح
اسهرني اللي قال فنٍ على صح= يرتب المسحوب ما فيه ترجيح
احلى من السـكر على الطيب والصح=حقد على كبد المصـالي كما الشيح
روزه ثقيلٍ بالموازين يرجح=ولا تعادلـه الوزون الطلافيح
مير إن بعض الناس بالهرج يفرح=والهرج ما يبري القلوب المجاريح
بعض العرب كالثور يضوي ويسـرح=ما يفهـم إلا قيل جفٍ مع جيح
ولا الشمس ما تغبي بشاش امرزح=والبحر ما تلحق عليه المياييح
ولا كير حدادٍ لشـعفٍ ينافح=ولا بنفاض المشـبه كما الريح
إن كان نهر النيل كمل وشلفح=ما عاد يلقي شربةٍ راعي السيح
وما أظـن حلم الليل يثبت إلى أصبح=ولا نصـلةٍ تأكل صقيل اللواميح
ولا عود تنباكٍ بريحان يلقح=حتى ولو كثرت عليه المواديح

على ياهـل الكوم العلاكيم هيدوا=قدر مشـرب الفنجال عوجوا حبالها
ابوصي عريب الجد منكم وصيةٍ =ثقالٍ معنيها خفيفٍ مشالها
الى لفيتوا دار كسابة الثنا =اللي إذا جافي المجالس مجالها
بني ثانيٍ كسابة العز باللقا =يعجز المدقق مايحسب افعالها
على ماحكوا عقـال ربعي وعددوا=و الاذكار والتاريخ صدق مقالها
يقولون ليمن أعتلوا كل قبا =صوت لهم طير السعد بمعداله

ترى داركم يا شيخ هي أم جدنا=ربى جدنا فيها وحنا عيالها
وترانا الى منه بدا لازمٍ بنا=نبرك كما تبرك دوارب جمالها
وعسى ديرة الاجواد دايم مريفه=تهيش الخزامى في مدامث سهالها
مداهيل حياني وحيى ولا بتي=وشيوخنا اللي ماضيات افعالها