من خلال سنوات دراستي تعرفت على الكثير من البنات على اختلاف أصلهم وفصلهم
على اختلاف لهجاتهم
على اختلاف ارائهم وطريقة تفكيرهم
كان وقتها كل شيء مثير للدهشة
فأنت ترى بنت الفراشة تنجح بامتياز
بينما بنت فلان الفلاني أبوها كما يسمونه هامور السوق تنجح بالدف هذا اذا مااحتاجت دور ثاني

المهم في حياتي بين جدران مدرستي المتهالكة بحكم غنها حكومية تعلمت الكثـــــــــــــير

كنت حينها أرى فلانه في كل حصة خياطة تقف في آخر الفصل
لا لذنب اقترفته
لكن لأنها لم تحضر الأدوات
فكما تقول حالتهم على قدهم

كانت تتمنى ان تحضر القماش وتبدأ في الخياطة مثلنا
كانت تتمنى لو انها تملك علبة ألوان ولوحة مثل باقي قريناتها

كنت ولازلت أرحمها
أصبحت حينما أذهب للمكتبة أجلب من كل شيء اثنين
فيستغرب أبي
فأقول البنت مسيكينه وانا احبها يا بابا مثل اختي
فأرى الابتسامة تعلو وجه أبي فاعلم حينها أنه يوافقني على ماأفعله


وحينما وصلت للمرحلة الفاصلة كما يسمونها التوجيهي ذلك الشبح الذي ذهب من حياتي غير مأسوفا عليه

أجبرت انا من قبل والدي(جعل ربي يخليهم لي) أن اغير مدرستي لأذهب لمدرسة اهلية فهم يوزعون درجات بالهبل ..على قولتهم..لكني لم أنل منها شيء فكله بفضل الله وبفضل دعائهم لي..

في بداية المر أحببت ان أخوض التجربة..
ان أكون بنت عز..
أن ادرس في مدرسة اهلية لا تخرجنا قبل الساعه اثنتين بعد ان ناخذ دروس تقوية ونشاطات..
ماشدني هي حصص الرياضة
لا اخفيكم كم كنت أحبها ..
وكأنني لا استطيع ان أقوم بها في بيتنا..
يالسذاجتي..




المهم تعرفت على بنات العز..
وليتني كنت بعلومهن جاهلة..

كنا نجتمع فنتبادل الحاديث البناتية..
بل سخافات بنات العز كما يحلو لي ان أسميها..
وليس لحد حق بان يلومني..


طلبوا رقمي فأعطيتهم رقم منزلنا..
فضحكوا.. حينها أحسست بالغصة..
ليه ماعجبهم رقمي بنات العز ذولا وش يبون؟؟
فقالوا نبي جوالك؟؟
قلت لهم لم املك بعد جوال..
ليه يالخبلة فيه أحد اللحين مامعه جوال؟؟
البزارين والشغالات اللحين معهم
وانتي مامعك؟؟
قهر
بنات لاتحرجونها يمكن اهلها معقدين


هل احسستي حينها يانجود بالخجل؟؟
أم بالقهر؟؟
بل احسست بكلاهما..

أطلقوا علي لقب معقدة
انتي وش فيك خليك فري..
تعرفون وش معنى فري عندهم؟؟

يمكن ماتعرفون
بس من عيوني أبقولكم
ولكم الحكم..


يريدونني ان اتفق معهم فندخل غرف الشات غرف الدردشة سويا ونرج الشات..يقولون والله هسترة ..بسطه..تتعرفين على القل يصير لك بوي فريند!!!
يالقباحتكم ..بوي فريند...ومن قال بأنني أحتاج للبوي فريند؟؟؟!


نجود يالخبلة بيقولك كلام حلو..
بيقولك سواليف تضحك..
اللي يعجبك إسلوبه لا تترددين
أضيفيه بالماسنجر..
شوفي شلون بيهدي لك بطاقات ومواوويل واغاني روووووووعه..
نجود بكره تشكرينا!!
وبعدين بيرسل لك مسجات حلوه.
وإذا احتجتي بيشحن لك جوالك!
بنـــــــــــات عز هاه


يسألوني ماذا يوجد بغرفتي فيضحكن..
يقولون يعني على الجدار وش حاطه وش معلقه؟؟
وش حاطه:ساعه ومرايه..
فتعلو ضحكاتهن

أحسست بالدم يغلي في عروقي..
لتجيبني إحداهن بعد ان تشققت من الضحك..
يعني شوفي يانجود انا حاطه بالجدار صور نواف التمياط..وساره حاطه صور خالد عبد الرحمن..وفلانه وفلانه..
نجود ياحبيلك يعني من مطربك المفضل؟؟
ماعندي..
طيب مذيعك لاعبك أي شيء؟؟
بعد ماعندي..

قلت لكم بنات عز ....عقول فارغة بجيوب مليانه..
فلتخسئوا....




غدير تحكي لنا سبب غيابها كيف دخل اخوها بغرفتها بآخر الليل
ووجدها تتحدث مع البوي فريند تبعها..
بالماسنجر..
لا آسفين .. غلطت اللحين صار الماسنجر موضة قديمة
غدير تقصد البالتوك..
وماادراك ماالبالتوك؟؟؟
فضربها على ان تورم وجهها..

مسكين يظن إنها بتخاف بتعقل..

قالتها بالحرف الواحد يأخذ جوالي يشيل النت فيه مية طريقة وطريقة مايدري عنها..
يالجرائــــــــــــتها..
تسألها ساره هاه وش اخبار مشعل؟؟
بخير أمس تعشينا بالفيصليه..
لأسألهم بكل برائتي:بالفيصليه؟؟
ساره: غدير تكفين خلي عنك هالمعقده وردي علي شلون دقيتي عليه؟؟
من جوال كومار سواقنا ..انتي بس ادهني سيره بخمسين والا ميه!!

ويقولون نجود أنتي معقده..




طبعا انا هنا ماأعم انا اتكلم عن ناس في يوم من الأيام كان سور المدرسه جامعنا سوى

أرجع اعيد انا ماعممت انا تكلمت عن الطبقه اللي عشت معهم
لا أكثر ولأأقل


ماأدري وش اللي جابهم اليوم على بالي
الله يهديهم ويستر عليهم..
كلها كانت شخابيط في محاضرة الجبر..
فاعذروني كان ودي أكمل بس هنا انتهت المحاضرة
وانقطع الإرسال عندي..