الأخوة والأخوات أيها الأحبه الأعزاء الذين يشرفني أن أكتب قصائدي
بين أيديهم ليكونوا أول من يقرأها ويسعدني آراءهم فيها وتعليقاتهم
التي تزيدني أملا وتوهجا ... وهذه القصيدة ألقيتها البارحة 6 / 12 / 1429 هـ
في زواج صديق لنا من قبيلة زهران وقد كُلفت من قبل الجميع ببناء القصيدة
وكذلك الزومالة .. والحمد لله توفقنا فيها وها هي القصيدة :
7777
77
7
يا مزون الوسم هلي من ثعولك هلّي = واسعدي عينٍ على شوف المطر ولهانه
نحمد اللي عم خيره دارنا بالكلّي = وارتوت من جود جوده واكتست ريضانه
هلها الثجاج سح وثم عوّد علّي = وسالت سيول الفيافي من علو وديانه
ويا عطور الشرق من ورد وزهور وفلّي = داعبي عطر الحجاز اللي نثر ريحانه
يا سلام الله عدد من للفروض يصلّي = وعد من حج الحرم واكمل جميع أركانه
يا سلامي من رجالٍ فالوفى ماتكلّي = للحفل واللي منسق للحفل وأعيانه
قادت ركاب المعزه والكرامه للّي = قدم إجزال العزيما الوافيا النشطانه
باسمه المشهور زهراني وقف وهلّي = بالرجال اللي لحفله شرّفو من شأنه
وبالنيابه عن ربوعي حرب أنا باحتلي = ماقفي وسط المنصة وابتدي تبيانه
حرب ربعي مثل ضلعٍ فالسما متعلّي = قصرهم فأرض الجزيرة شامخٍ بنيانه
حرب ربعي سيوف في وقت اللقا تنسلّي = فوق هامات العداه وللنصر كسبانه
للوفي وافين لحظة واجبه ما تزلّي = فزعة اللي ضامه الوقت وغرق فحزانه
ويا بني زهران طبع الجود فيكم حلّي = والكرم منك وفيكم أصله وعنوانه
يا بني زهران يجمعنا قصر له ظلّي = من شبابه كلنا وعنواننا عنوانه
الشبابي لو يطول الوقت واللى يقلّي = للخوي والجار يرجح بالسعد ميزانه
وألف مبروك الفرح يا أبو فهد واستلّي = من سنينك فرح ذا الليلة وعيش الحانه
جوك ربعك في فرحك تشاركك وتعلّي = صرح شايد بينكم وتزيد في سيسانه
العريس الليلة الفرحة تتله تلّي = صقر من حوله صقور وكنّها جنحانه
جوه زفو له سرور الخاطر المتسلّي = وقدمو له تهنيئة وقلوبهم فرحانه
وآخر الأبيات ندعي ربنا المتولّي = يجمع العرسان في خير وسعة وأمانه
واذكر المبعوث بالدين وعليه أصلّي = الشفيع اللي جِنان الخلد هي مسكانه
اللهم صلي وسلم وبارك على عبدك ورسولك محمد
مع أعذب التحايا للجمييييييييييييييييع