تغيـب وتبتعـد عنـي ولا تسـأل ثـلاث شهـور
ثلاث شهور ماتسأل .. كأنـي ذابـح ٍ لـك حـي
لو إنه بادي ٍ منـي زلـل وإلا مـواري قصـور
أنا اللي بطلبك تكفى .. لجيت استسمحك لي .. عي
يمر اليوم يجر اليوم وأنا أحسب الثوانـي دهـور
على رجوى الأمل عايش وأقول إن حضرتك بتجي
تجيني .. تجمع شتاتي .. وتجبر خاطر ٍ مكسـور
كسره الصد والهجران .. جروحك كاويتنـي كـي
إذا إنك ناسي ٍ وعدي .. ترانـي للوفـي مابـور
على عهد الوفاء باقـي .. تذكـر كلمتـي ياخَـي
وفيت .. ولاجنيت إلا جزاء يشرح معاني الجـور
بوقت ٍ فيه ذاخر لك صـدر يبقـى ظـلال وفـي
تعاهدنـا أنـا ويـاك نحـدّث للوفـاء دسـتـور
حجر أساسه الطيبه .. وأنـا اللـي بانيـه بيـدي
أنا بنشدك .. جاوبني .. وشهو لـه تهـد السـور؟
ياخوي إنطق .. أبي أفهم .. دخيلـك لاتهبـل بـي
دخيلك لاتناسى يوم زرعت إلك الطريـق زهـور
بدل ماتسقي زهورك .. تشـح بقطريتـن المـي ؟
تشح بقطرتين المي وأنـا لجلـك قطعـت بحـور؟
لجل مركب هوانـا فـي موانـي شوقنـا يرسـي
ولكن وين يرسي وأنت ترمي بالطريـق صخـور
هذا اللي شفت بعيوني .. ولا أدري وش تخفّي لي
بعد ماكنت لك شمعـه تضـوّي دربـك المهجـور
تعال إحرق بها صدري .. وربي مابقـى إلا هـي
حسافه خابت الهقوه .. حسافه ماسمعـت الشـور
" حسافه " ماتوكل عيش .. ولكـن مابيـدي شـي
صدق من قـال هالدنيـا تـدور وماعليهـا يـدور
أبثبت لك مع الأيام وأبـي صبـرك علـي شـوي
عفاك الله ياقلبـي .. علـى هـم الزمـن ماجـور
تداوي جروح خلق الله .. وكأنك ذابح لهـم حـي
عبدالله بن فهد