قلبي تحطم واصبح الهم يرميـه=من نضرة كثرت همومي بعدهـا
عودٍ على الشباك دمعـه يباريـه=يبكي كما خلفه راحـوا بولدهـا
قمت اناضر له وعينـي تراعيـه=وقلبي ركز بين الضلوع وكسرها
عبر عن الماضي بدمعة جرت فيه=وضاقت به الدنيا وكثرت عوجها
سنه كبير ومالقى مـن يخاويـه=وعجيزه ماتت وارتمى من بعدها
ماله أمل غير ابنه اللي هقى فيه=انه يفـرج علـةٍ بـه ضهدهـا
بس للأسف حتى الولد مابلش فيه=ماسكنه بالديـره اللـي رغبهـا
سكنه في بيـت طويلـه مبانيـه=وكثرت امراضه والمدينه سببهـا
واليوم جرح العود من هو يداويه=عميت عيونه والمـراره شربهـا
ماله ونيس ولاحبيـب مهاويـه=الا دموعه مـن عيونـه حدرهـا
مستعجل عمره يبي الموت يلفيه=ضاقت به الدنيا وضايق بحرهـا
يكفيـك ياوقـت كثيـره بلاويـه=ذوقتنا غبـن الليالـي وكدرهـا
نوب نبيع الوقت واحيان نشريـه=واحيان تخلط مرها مـع عسلهـا
يالله ياللي من طمع فيك ترجيـه=انك تجنبنـا المصايـب واهلهـا
ياواحد معبود والـرزق تعطيـه=ياواحد معبـود منـزل مطرهـا