[سعد الشقحاء]

البارحة فكري مشـتت وحــــــيران=من سبته ضايق وفالصدر ضـــيقه
المشكلة ماهيب صـدن وهجــــران=المشكلة يومي عـرفت الحقــــــيقه
حقيقة اللي كان لـه قدرن وشـــــان=اللي مواثيقه بصـدري عمــيـــــقه
ما كنت اصـدق فيه من كاينن كـان=شخصن اعزه دون كل الخلــــيقه
ما قيل فــيه اقــول زورن وبهــتان=كلفت نفسي فــــــوق مـالا تطيــقه
لكن بعد ما شفت انا شوف الاعيان=هانت علي ذيك العهـود الوثـــيقه
خلاص بعد اليوم فـي ناظري هـان= لاصار ما يحفظ عهودي طــريقه
يا شينها لا طاح من عينك إنســـان=ياشين نكران الصديق لصـــديـقه
وياشين لامن صرت واثق وغلـطان=ياشين طعنات القلوب الرقـــــيقه
من يامن الدنيا على طـول الازمان=لا بد عسرات الليالي تعــــــيـــقه
رحلتك في الدنيا مديــنن وديــــــان=لا حان دينك ممـــهلك لو دقيــقه
هذا كلام التجربه خــــــــير برهان=من وافين ذاق الغــدر من رفيقه
ماهو صحيح ان قال ماهوب ندمان= الا الندم ولع بقــلـــبه حــــريقه
عن واقعن عاشه وعن خافيــن بان=أصبح سرابن مـنه مــــابل ريقه
حتى لو انه جامل الــنـــاس بلـسان=اصبح مع الهوجاس كنه شقــيقه
يمكن مع الايام يســــلى بنــــسيان=مير البلاء نقض الجروح العتيقه