عندما عدت من مهمتي الرسميه
ارسل الاخ الشاعر عبدالله العتيبي
لي رسالة تتضمن هذه الابيات وقمت بالرد عليه بمثلها
لاطلاعكم عليهما والتواصل
بدع الشاعر عبدالله العتيبي
اليوم ياشاعر سناعيس وشلون=أصرّف أيام كثير نكدها
ولاني وراها يابن الأجواد مفتون=واللي مكونها لابد يحصدها
ناس بها مابين راكض ومغبون=ومهما ركض يروح ماحصى عددها
وان كان شفت سعيد لحضات محزون=سهلاتها تاتي بعدها عقدها
ومن لا اعتبر مسكين في دورة الكون=ياما طحن قوم شديد جلدهها
يهوي بهم من عالي الحص للهون=ويرثي ليال عاش لذة رغدها
ورجاي بالله محيي البيد بمزون=لين اوديتها قام يعلو زبدها
وصلوا عدد ماشافوا الخلق بعيون=وماحنّت الخلفه لشوفة ولدها
على محمد خاتم للنبيون=جاء بالرساله ثم ثبّت عمدها
رد سناعيس
حي الكتاب اللي وصل منك موزون= ابيات وبناخيك ليّه سردها
تشكي من الايام ومن حالة الدون=وانت الذي عاشيته امر وادها
هذي هي الدنيا وياما بها كون=أرجي عسى الله عنك يصرف كمدها
كم واحد فيها من اللي يعانون=مثلك ومثلي راحته يفتقدها
ياصاحبي وان كان جابت لك طعون=إنته لها مهما يطوّل أمدها
بالأوله حاول تجيها على هون=وحاول تسايرها وتاخذ بيدها
وبالثانيه اعمل مثل مايقولون=اليد دون الحلق لامن نشدها
وان عاضبت وأغضت وصارت لك تخون=اضرب على الكايد وتصفي بعدها
وصلاة ربي عد ماهلت مزون=على النبي واعداد سامع رعدها