السادة اعضاء ومشرفي وزوار منتدى الفطاحلة الكرام
يشرفني ويسعدني ان اشارككم بهذه القصيدة قصيدة متقاعد وفاضي على أمل ان تحوز على رضاكم . وتقبلوا فائق تحياتي وتقديري
لا دق هاجوس قلبي والهو هاضي = وطريت علينا مشاوير عشقناها
اقول ياقلبي لاتزعل وتغتاضي = مادام ربي لنفسي حقق امناها
الجيب جاهز وانا متقاعد وفاضي = والى نوينا على الطرقه مشيناها
الشاصي اللي بحوضه كامل اغراضي = والباقي من المحطه الى غشيناها
من حايل مجهزه تجهيز مرتاضي = ومن السنيدي له العزبه شريناها
صندوق عده مقسم كنه احواضي = من فوق عدة وتحته تانكي ماها
ولستبنته بايسر الصندوق قباضي = وتوانك اثنين بالبنزين نملاها
والايكم الى زهمنا شاشته تاضي = مع قارمن للدروب اللي جهلناها
يازين وصفه مابين اقبال واعراضي = وارد بريمي اوصافه ماحصيناها
الى اشتغل للمكينه حس قضقاضي = قضقاض عين تحدر في الجبل ماها
ورفارفه ساكبات ماهن اعراضي = وخطوطه الحمر على الجنبين تزهاها
والشبك نيكل عريض و داخله فاضي = حتى المكينه هبوب الريح يغشاها
وللسحب ونشن يقوم بعدة اغراضي = له عدة داخل الصدام مخباها
والى تنهض مع الصحرا تنهاضي = كل التضاريس لو صعبت توطاها
والى انطلق بين رمشت عين واغماضي = عشرات الاميال يقطع لو حسبناها
الجمس والا الشبح في الجيب ماعاضي = والبورش واللكسز والبي ام واخواها
والجيب بين المواتر كنه القاضي = كل المواتر بميزاته تحداها
هو منيتي ان ربعت وديان وفياضي = مع الرفقة اللي يطربني مخاواها
لا شفت سفح الجبل كاسيه حماضي = والروض متنوع نبته ومرعاها
والا القبه لا كست ضلعان ورياضي = ياكن موج البحر وصفه وحلياها
وان يسر الله علي لاعوض الماضي = ايامنا اللي مع الواجب قضيناها
وارسم مشاوير مشتايه ومقياضي = وانسى هموم الزمن والا اتناساها
وان كان ربي علي برحمته راضي = افضل غنيمه من الدنيا كسبناها