القاء
يقولوا بالمجامل والمرونه يكسب الجمّال= واقول الشئ لامن زاد عن حده قلب ضده
ماشوفه هالزمن مؤسف ولا يقبل بأية حال= نفاقٍ في نفاق وغض طرفٍ قارب الرده
وانا مقدر عليها الله خلقني واضح الأفعال= فما في القلب يعكسه اللسان ويظهر لْبده
وما خالف لشرع الله فانا ضده بليّا جدال= فلا عندي مرونه فيه لو عانيت من لده
وحتى لو قضيت سنين من عمري وانا رحال= فلاني من تغيّر عن طباع ابوه او جده
احب الرجل واضح كالذهب ماداخله صلصال= يقول اللي بقلبه مايخاف افعال مرتده
واحب الرجل يسعى بالفضيله فعل لا اقوال= نقيٍ طاهرٍ يحسب حساب اليوم مع غده
بعمق إيمان في قلبه ولا هو خادع ومحتال = ولا متزمتٍ ياخذ بقشر الأمر له عده
يساعد من يشوفه يستحق ابجهد ولاّ مال= ويحتقر الحرامي لو مدحه البعض من مده
برزقه قانعٍ ماهوب من يركض ورا الإنذال= من اللي شبهة ماله وعند الناس من قده
رفيع الراس ما يخشى ولا لنفسه قبل إذلال= ولو عانى من الويلات مهما كانت الشده
واحب اللي يزن هرجه ولا هو للهرج نقال= ليفتن بين خلق الله ابو وجهين في وده
واحب الرجل مايمشي بظلما بالفعل ختّال = جبانٍ ما يواجه خصم والنيران مشتده
واحب اللي مْتواضع يحترم غيره بكل إجلال= واذا مسؤول بابه دائما مفتوح مايرده
ولا عنده بطانه فاسده تصفده بالأغلال = وتعمي ناظره مايدري اللي معه أو ضده
تدور مصلحتها لو تبي بيعه بنصف ريال = تقرب من تبي حتى تصير اشجار ممتده
واحب اللي يخاف الله فلو يمهل فلا إهمال= عقابه واردٍ للي تجاوز في الردى حده