كـــــــوكـــــتـــيـــل 3

شجاع عمر الأكلبي · 02-02-2009, 12:45 PM

بعض العرب يدله مع من يفاجيه=وينسى همومه لاسمع عزفة الناي
يأكل ويشرب في عزا كل أهاليه=ويكفيه عن كيف اليمن شربة الشاي
والبعض يضحك والبلا وسط لاجيه=للحزن في قلبه مع الليل مضواي
لانامت عيون الملا باح خافيه=يجر صوت الحزن بالآآآآه والآآآآآآآآي
خطر ٍ على قلبه تصرّم عراويه=يشدا لذيب ٍ تالي الليل عوّااااااااااااي
لاجر صوته من قسا الحزن طاويه=والليل شاتي مالقا زاد ودفاااااااااي

أكبر مصيبة تمر الرجل وتهـزّه=وتصيبة بحالة الأطـرم لياجاتـه
تهمة ردا تجرح الخفاق وتحـزّه=وطبع الحياوي يغلبه بالحيا سكاته

تقيّر منامي والسبب لاجي ٍ بالجـوف=يحطب الضلوع ويشعم النار في قلبي
من أيامي اللي مقبلة جاح قلبي خوف=وابصمت عسى ما صابني يفرجه ربي

سلامي سلام ٍ يبهج القلب يالمقصـود=سلام ٍ من القلب الذي ماحوى غيـرك
عليك الله أكبر كان طاوعت بي مقرود=وعلى مافعلته فيّـه مكثّـر ٍ خيـرك

بامشي على جنب خوف القيل والقالي=وأسلم على النفس من سين ٍ يبي جيمي

راع الهوا لو يجحد الشوق مكشوف=يسرح بفكره والحزن في عيونـه

وداع ياعذب شوقي ياهوا بالي=وداع يامن بقلبي ماسكن غيره
لوكان أنا عنه لاداله ولاسالي=ياليت ربي كفاني شره وخيره

أرحل وأنا ارحل وكل يروح في حاله=ولاعاد ترجي وصالي ماحصل كافي

ودعتهـا والحـزن يشـوي فـوادي=والدمع غصب ٍ من على وجنتي ساح
من بعدها ويـن الفـرح والسهـادي=من بعدها ياكيف بأسلـى وبأرتـاح
ومن بعدها مانيـب رايـح وغـادي=وعزيل مثلي في هوا الفاتنـة طـاح

اكذب ليـا قلـت باسلـى وأتناساهـا=وبأدعس على القلب وأبقى عالي الهامة

القلب منّـك يالحبيبـة عذابـه=ولاعاد أميّز عامها من شهرها
لك في نواة القلب قدر ومهابـة=وقصور حبّك وسط قلبي عمرها
العز والنامـوس فوقـك ثيابـه=ثياب طهر ٍ من يعرفك ذكرهـا

لاعاد ترجي وصالي بعد ذالليلة=مابيك ترجع عليّ ولا تحرّاني

كذا كـذا الدنيـا دروس وتجـارب=ياما وياما مـن دروس وتجاريـب
من كأس غدر الوقت راوي وشارب=وبين الردا والطيب ذقنا المشاريـب

جرّيت لي من داخل الجوف ونّات=ونّة فراق ٍ داخـل القلـب سمّـه
وين أنت ياللي تجرح القلب بسكات=أما أقتله ولا على الجـوف ضمّـه

حبّك لجا بالقلب مانيب ساليـه=أنت الذي في القلب مكن مقامه
يومي نهاره هم وأسهر بداجيه=أعوي مع ذيبه وألاحي حمامه
ومقابلك والله والله مـا أرجيـه=مايستوي حرب الهوا مع سلامه
والقلب منك اليوم ناهيه ناهيـه=اليوم هذا حان منكـم فطامـه

ليت الغلا ينشاف مثل المزن ياحبي وغـلاي=وتشوف مزن الحب لك في خافقي تملا الفضا

مادام تعلـم غايتـي وش ورايـة=وعندك خبر قلبي من الوجد مزحوم
فلا تنشد من الحال تبحـث خفايـة=نشدتك ترّث لي هواجيس وهمـوم

طبع البشر دايم ٍ بـه زايـد ونقصـي=وماحد ٍ منـزّه عـن الـزلات هذيّـه
من كان في خاطره شي ٍ على شخصي=أرجـوه يسمـح ويدمح زلتـي ليّـه

أسج القدم وأجر صوتـي مـع الخليـان=عسى سجتي والصوت تطفي لهيب الجاش
ولالي بخل ٍ يكثـر المـزح والخلاان=أبرتاح من عشرتك ياللي عزومك مـاش

اليوم كل الناس عشّاقة=غزاهم العشق ياساتر
عشّاق وتقاطع السّاقة=وأشوفهم حيلهم فاتـر
ومن طبعهم دوم بوّاقة=السلم من صوبهم باتر

شي ٍ لجا بالقلب ماهوب عادي=أحاول أجحد لكن إن واقعه غير
مابيه يعلم بي قليـل الرشـادي=اللي على الهفّات يعطي التباشير
من غيبتك يازين ولّـع فـوادي=وأظن مالك عذر مني وتبريـر

ألف ٍ هلا ياصوت من بالوفا جاد=رغم الزعل بيني وبينه وفالـي
لبيه ياصوت ٍ على مهجتي ساد=صوت الحبيب اللي بوده صفالي
كلّم يعايدني حلا كـل الأجـواد=اللي بقلبه قصر حـب ٍ بنالـي

الأموره · 02-02-2009, 12:49 PM

الأكلبي ..~

درر و ربي ..~

و كلمآت جدا رائعه ..~

هطول ما بعده هطوووول ..~

اسمح لي اسجل اعجااابي

بكل بيت في هالصفحه ..~

تباااااااارك الرحمن ..~

بجد ابدعت بكل ما في الكلمه من معنى ..~

صح لساااانك ملايين ..~

سلمت و سلم فكرك ..~

ألف شكر لك ..~

دمت برعاية الخالق ..~

عبدالله خالد البكر · 02-02-2009, 01:04 PM

أسج القدم وأجر صوتـي مـع الخليـان
عسى سجتي والصوت تطفي لهيب الجاش
ولالي بخـل ٍ يكثـر المـزح والخـلاان
أبرتاح من عشرتك ياللي عزومك مـاش

لاهنت وصح لساانك
ابيات رائعه وحضور مميز
تقبل مروري